«Prezıdent ákimshiliginde jaýapty qyzmetterdi atqaryp, Parlament Májilisine eki márte tóraǵa bolyp saılanýy – Orekeńe artylǵan zor senim men jaýapkershiliktiń jeńil bolmaǵanyn ańǵartady. Kózi tiri bolsa ol búgin 70 jasqa tolar edi. «Jaqsynyń aty ólmeıdi, ǵalymnyń haty ólmeıdi» demekshi, Rýdnyı qalasynda ilingen eskertkish taqta Oral Baıǵonysulynyń eli úshin jasaǵan eńbegin halqynyń, osy ǵımaratta oqıtyn jastardyń esine salyp turatyny anyq», dedi Qostanaı oblystyq máslıhatynyń hatshysy Saılaýbek Esjanov.
Mýzyka zertteýshisi Gúlnar Álpeıisova Oral Muhamedjanovtyń atasy Muhamedjannyń arqanyń án mektebiniń iri ókili ekenin, bul ónerden ákesi Baıǵonys ta, ózi de quralaqan bolmaǵanyn aıtty. Táýelsiz elimizdiń quqyqtyq-zańnamalyq bazasyn nyǵaıtýda kóp eńbek sińirgen, Elbasynyń senimdi serikteriniń biri bolǵan Oral Muhamedjanovtyń eńbegi men ónegeli ómiri keıingi urpaqqa úlgi bola beretinin Rýdnyı qalasy ákiminiń orynbasary Elena Skaredına jáne Oraldyń dosy Jumaǵalı Qasymov erekshe aıtyp ótti.
Oral Baıǵonysulynyń jary Sholpan men qyzy Zýhra eskertkish taqtanyń ashylýyna qatysyp, otbasy atynan jerlesterine razylyǵyn bildirdi.
Názıra Járimbet,
«Egemen Qazaqstan»
Qostanaı
